Ateni: La crisi ecunòmica dâ Grecia si rifletti ntê mircati di tutta l'Europa. Li obbligazzioni grechi 'n euru rischianu di nun essiri rimbursati siddu lu FMI e l'Unioni Europea nun prestunu armenu 9 miliardi di euru ô cuvernu.
Golfu dû Messicu. Na chiattaforma di pitroliu pigghiau fòcu e si ni calau sutta lu mari, causannu la morti di 11 pirsuni e nu disastru eculòggicu mpurtanti.
Lu vurcanu ca eruttau n'Islanda s'attruvava ô mumentu di l'eruzzioni sutta lu ghiacciaiu Eyjafjallajökull.
Reykjavik: L'eruzzioni di nu vurcanu ntâ parti sud di l'Islanda sta facennu funniri nu ghiacciaiu e giganteschi quantità d'acqua si sdurrubbanu versu lu mari. Enormi nuvuli di cìnniri si stannu diriggennu versu l'Europa sittintriunali, facennu chiudiri cumplitimenti l'ariuporti dû Regnu Unitu armenu nzinu ê 6 dâ menza sira.
Reggiu Calàbbria: La Polizzia arristau Giuvanni Teganu, boss dâ ndranghita, 70 anni, unu dî 30 òmini cchiù piriculusi n circulazzioni, secunnu na lista dû ministeru di l'internu. L'arrestatina fu accumpagnata di applausi pô boss, cunnannati cchiù tardu di na manifestazzioni citadina di appuju â Polizzia.
