Anap

Anap
Анапа

Lidnanznam	Flag
Valdkund	Venäma
Eläjiden lugu (2022)	95,873 ristitud
Pind	58,98 km²
Pämez'	Vasilii Švec (reduku 2020—)
Telefonkod	+7−86 133-xx-xxx
Avtokod	23, 93, 123
Aigvö	UTC+3 (MSK+0)

Anap (ven.: Ана́па) om Venäman lidn-kurort da meriport Krasnodaran randan päivlaskmas, sodahoštusen lidn. Se om randan kahesanz' lidn eläjiden lugun mödhe, Anapan lidnümbrikon administrativine keskuz, mülüb sihe.

14. voz'sadal oli tetab kuti Genujan Tazovaldkundan Mapa-kolonii. Ottomanan imperii pani nügüdläižen eländpunktan alust — sauvoi lidnust vll 1781−1782. Kozakad anastiba sidä severz'-se kerdoid sodoiden aigan. Anap kändi Venäman imperijan palaks vl 1829. Om lidnan statusanke vspäi 1846.

Toižen mail'man sodan aigan kurort oli pandud mantazole, udessundutihe 1950-nzil vozil. Raudte tuli lidnha Anap-raudtestancijaks vl 1979.

Anap šingotase lebuturizmal (severz'-se millionoid ristituid vodes, merikül'bendrandan kümenikad kilometrid, sanatorijad, tematižed küläd da puištod), sömtegimištol (leibtegim, kaks' vintegint, lihakombinat, maidtegim, oludentegim), sauvondal da torguindal, sauvondmaterialiden i plastmassan pästandal. Lidn om ümbärtud vinmarjan kazvatandan rajonal.

Lidn-lebutaho sijadase Mustmeren pohjoižpäivnouzmaizel randal, 11 m ü.m.t. keskmäižel korktusel, Kavkazan ezimägištonno.

Matkad Krasnodarhasai om 130 km päivnouzmha orhal vai 165 km avtotedme. Lähembaižed lidnad oma Novorossiisk 40 km päivnouzmha orhal vai 52 km avtotedme i Temrük 43 km pohjoižhe orhal, 55 km avtotedme vai raudtedme.

Klimat om Keskmeren kuivahk, tal'vel voib toda pakaižid pohjoižespäi. Elokun lämuz +25,4 C°, vilukun +3,3 C°, voden keskmäine lämuz +13,6 C°. Ekstremumad oma −23,9 C° i +38,2 C°. Paneb sadegid 560 mm vodes, enamba kaiked kül'mkus-vilukus (52..68 mm kus). Meriveden keskmäine lämuz +20..+24 C° kezakus-sügüz'kus, tal'vaigan +7..+9 C°.

Kaik 51 eländpunkt mülüb lidnümbrikho Anapan ližaks, ühtištadas kahesaks küläümbrikoks. Lidnümbrikon pind — 981,86 km², om korktusid 439 metrhasai ü.m.t..

Edeline lidnümbrikon pämez' om Jurii Poläkov (reduku 2017 — heinku 2020).

Vn 2010 Venäman rahvahanlugemižen mödhe lidnan eläjiden lugu oli 58 990 ristitud, lidnümbrikon — 70 280 (Anapata). Vl 2018 kaik 75 865 ristitud elihe lidnas i 185 888 ristitud kaikes lidnümbrikos. Kaikiš suremb lidnan i lidnümbrikon ristitišt om nügüd'. Vl 2022 kaik 213 617 ristitud oma lidnümbrikon kaikenaigaižikš eläjikš.

Rahvahad (lidnan eläjad, enamba 1 % vl 2010): venälaižed — 86,0 %, armenijalaižed — 6,6 %, ukrainalaižed — 2,2 %, toižed rahvahad — 4,4 %, rahvahuden ozutandata — 0,8 %.

Ortodoksižen hristanuskondan nell'toštkümne pühäpertid^[1] oma saudud lidnas: seičeme jumalanpertid i seičeme časounäd.

Lapsiden opendusen aluzkundad oma severz'-se päivkodid, keskškolad. Lidnan professionaližen opendusen aluzkundad oma Anapan holitišiden sferan kolledž^[2], maižandusen^[3] i privatine industrialine^[4] tehnikumad, toižiden lidnoiden kolledžiden viž filialad, Venäman FSB:n mererandan kaičendvägiden institut i üläopendusen aluzkundoiden filialad (Krasnodar, Soči, Moskv).

• 
  Lidnümbrikon tobmuden sauvuz (2015)
• 
  Ph. Onufrii Suren jumalanpert', vn 2007 nägu
• 
  Ph. Serafim Sarovalaižen jumalanpert' sauvomižen lopus, vn 2010 nägu
• 
  Innovacine «ERA»-sodatehnopolis vl 2018
• 
  «Krasnaja Ploščad'»-torguimižbobuštuzkeskuz vl 2011 (Rusked torg)
• 
  Merivaldmad lidnas vl 2013
• 
  Anap-päraudtestancijan sauvuz vl 2008

• Vaugedvenäma Gomel', Vaugedvenäma (vspäi 2010)

1. ↑ Anapan pühäpertid sobory.ru-saital. (ven.)
2. ↑ Anapan holitišiden sferan kolledžan sait (anapa-college.info). (ven.)
3. ↑ Anapan maižanduztehnikuman sait (ast-anapa.ru). (ven.)
4. ↑ Anapan industrialižen tehnikuman sait (aitanapa.ru). (ven.)

• Lidnan-kurortan tobmuden sait (anapa-official.ru). (ven.) (angl.)

Anap Vikiaitas