Timašovsk

Timašovsk
Тимашовск

Lidnanznam	Flag
Valdkund	Venäma
Eläjiden lugu (2023)	51,398 ristitud
Pind	30 km²
Pämez'	Nikolai Panin (kül'mku 2018—)
Telefonkod	+7−86 130-xx-xxx
Avtokod	23, 93, 123
Aigvö	UTC+3 (MSK+0)

Timašovsk (ven.: Тимашёвск, mž. suline Тимаше́вск) om Venäman lidn, lidnankund da raudtesol'm Krasnodaran randan keskuzpalan pohjoižes. Se om Timašovskan rajonan administrativine keskuz.

Eländpunktan aluz om pandud vl 1794 kuti Timoševskii-kuren'. Kätihe stanicaks vl 1842, sai lidnan statusad nügüd'aigaiženke nimenke vn 1966 30. päiväl tal'vkud.

Timašovsk šingotase sömtegimišton (saharan tegim, konditerine «Kuban'»-kombinat^[1], maidkombinat, kolbasan tegim, likörvodkantegim, villänpurnud, kofen, hernhen i kukruzan pakuitez), söndtavaroiden pakuitesen edheotandoil (kartonaspäi i lehtezraudaspäi), mugažo pästtas sauvondmaterialid (savič, asfal't).

Lidn sijadase Kirpili-jogen oiktal randal tobjimalaz (ven.: Кирпили́ 202 km pitte, lankteb Kirpilin limanha Azovmeren randpolel), 20 m ü.m.t. keskmäižel korktusel.

Matkad Krasnodarhasai om 65 km suvhe orhal, avtol vai raudtedme. Lähembaine lidn om Korenovsk 40 km suvipäivnouzmha orhal vai 55 km avtotedme.

Kirpičnii-žilo (124 rist. vl 2023) mülüb lidnankundha Timašovskan ližaks.

Lidnankundan tobmuden pämez' om sen Administracijan pämez'. Edeline Administracijan pämez' om Pavel Buräk (sügüz'ku 2015 — kül'mku 2018). Lidnan Nevondkundan ezimez' om Denis Rezun vn 2024 kül'mkuspäi. Edeline nevondkundan ezimez' om Sergei Kačanov (tal'vku 2005 — kül'mku 2024).

Vn 2010 Venäman rahvahanlugemižen mödhe lidnan eläjiden lugu oli 53 924 ristitud, rajonan ristitišton pol', vn 2021 — 51 858 ristitud. Kaik 52 527 ristitud elihe lidnas i 52 601 ristitud kaikes lidnankundas vl 2017. Kaikiš suremb lidnan ristitišt oli 53..54 tuhad eläjid vll 1996−2013 (54 200 rist. vl 2006).

Rahvahad (enamba 0,4 % vl 2010): venälaižed — 90,0 %, armenijalaižed — 3,0 %, ukrainalaižed — 1,6 %, toižed rahvahad — 3,2 %, rahvahuden ozutandata — 2,2 %.

Rahvahad (enamba 0,4 % vl 2021): venälaižed — 95,2 %, armenijalaižed — 2,2 %, ukrainalaižed — 0,5 %, toižed rahvahad — 1,7 %, rahvahuden ozutandata — 0,4 %.

Ortodoksižen hristanuskondan viž pühäpertid^[2] oma saudud lidnas: Pühän Hengen mez'jumalankodi (vspäi 1992, ezmäine pühäpert' om saudud vll 1987−1991), Sündun Voznesenjan päjumalanpert' (om sauvomas vspäi 2009) i loičendpert', Pühän Jumalanmaman Emäganpäivän jumalanpert' i kaks' časounäd.

Lapsiden opendusen aluzkundad oma kahesatoštkümne nimitadud i nomeruidud päivkodid (nomer 1..3, 5..8, 10..14, 17..20, 42, raudten 98), kuz' keskškolad (nomer 4, 5, 11, 18, 19, kozakišton 16), lapsiden sädamižen keskuz, lidnan muzikškol i čomamahtoine škol, rajonan kaks' sportškolad (nomerata i nomer 1). Timašovskan kadrresursoiden tehnikum^[3] om lidnan professionaližen opendusen aluzkundaks.

Kaik kaks' raudtestancijad i koume seižutezpunktad oma lidnas. Timašovskai-sol'mraudtestancii (ven.: Тимашёвская) radab vspäi 1913, se om passažiroiden i jüguiden täht. Läbitajad lidnad «Rostov Donal — Krasnodar»-elektrojonused tehtas seižutest Timašovskan ümbärduz-raudtestancijal vaiše (ven.: Тимашёвский обход). Seižutezpunktad oma Elektrodepo, Saharantegim, 63nz' kilometr.

Avtobusad oma kundaližeks transportaks lidnas, privatižen edheotandan seičeme maršrutad. Avtobusad ühtenzoittas rajonan eländpunktoidenke (ühesa maršrutad).

• 
  Rahvahanikoiden i Suren sodoiden memorial da velleskaum lidnan puištos (2014)
• 
  Pühän Hengen mez'jumalankodi, vn 2010 nägu
• 
  «Garmonija»-torguimižbobuštuzkeskuz vl 2020 (Garmonii)
• 
  Rajonan kul'turkeskuz (2020)
• 
  Timašovskai-päraudtestancijan sauvuz vl 2022

1. ↑ Konditerižen «Kuban'»-kombinatan sait (tikkom.ru). (ven.)
2. ↑ Timašovskan pühäpertid sobory.ru-saital. (ven.)
3. ↑ Timašovskan kadrresursoiden tehnikuman sait (ttkr.ru). (ven.)

• Lidnankundan tobmuden sait (городтимашевск.рф). (ven.)

Timašovsk Vikiaitas