Bamako

Bamako

Lidnanznam
Valdkund	Mali
Eläjiden lugu (2022)	4,227,569 ristitud
Pind	2,992 km²
Pämez'	Adama Sankore (heinku 2007—, Adama Sangaré)
Telefonkod	+223−20, +223−44
Aigvö	UTC+0

Bamako (mugažo francijan kelel) om Malin pälidn da kaikiš suremb lidn. Se om valdkundan pälidnaine ümbrik administrativižešti.

Istorii

Ristitun eländsijad oleliba neciš mectahondas amussai. Nügüdläižen eländpunktan aluz om pandud 17. voz'sadal. Kätihe Bamakod Francijan Sudan-kolonijan pälidnaks vspäi 1899.

Geografijan andmused

Lidn sijadase valdkundan suvipäivlaskmas, Niger-jogen muugotil lapakoil randoil, 350 m ü.m.t. keskmäižel korktusel. Tegimišton zon levineb jogen pohjoižel randal. Koume avtotesildad om saudud joges päliči vozil 1960, 1992 i 2011.

Klimat om tropižen savannan kaks'sezonine, subekvatorialižen pirdoidenke. Voden keskmäine lämuz om +27,8 C°, kuidme +25..+31 C° vodes läbi. Ekstremumad oma +6 C° i +45 C°. Paneb sadegid 991 mm vodes, enamba heinkus-sügüz'kus (196..290 mm kus), kuiv sezon oleskeleb kül'mkus-sulakus (29 mm pordos). Kun keskmäine relätivine nepsuz vajehtase 20..27 % röunoiš tal'vkus-keväz'kus, 65..81 % kezakus-redukus.

Bamako jagase kudeks nomeruidud kommunaks (I − VI).

Eläjad

Vl 1960 (ripmatomuden voz') 160 tuhad ristituid elihe lidnas. Vl 2009 eläjiden lugu oli 1 809 106 ristitud 245 km² pindal. Kaik 3 337 122 eläjad oli kaiken lidnan regionas 2992 km² pindal vl 2016. Migracii külišpäi i verhiš lähižiš maišpäi om luja. Lidn kogoneb valdkundan ristitišton videndest, no tegimišton pästandan enamba pol't.

Transport

Maršruttaksid oma kundaližeks transportaks Bamakos. Lidn om «Dakar — Niger»-raudten lopstancijaks, ottas Nigerad laivjogeks. Bamako om ühtenzoittud avtoteil valdkundan agjoidenke.

Rahvahidenkeskeine soda- da civiline Malin ezmäižen Modibo Keita-prezidentan nimed lendimport^[1] (edel 2016. vot nimitihe franc.: Bamako-Sénou, BKO / GABS, 533 tuh. passažiroid vl 2012) sijadase 15 kilometras suvhe lidnan keskusespäi. Tehtas reisid Afrikan päivlaskman i pohjoižen pälidnoihe, Parižha i Stambulha.

Homaičendad

1. ↑ Bamakon Rahvahidenkeskeižen lendimportan sait (aeroport-bamako.com). (fr.)

Irdkosketused

• Lidnan ohjastusen oficialine sait (bamako.ml). (fr.)

Bamako Vikiaitas