Bangi

Bangi
Bangui (franc.)
Kötä gbätä tî Bangî (sango)

Valdkund	Keskafrikan Tazovaldkund
Eläjiden lugu (2012)	734,350 ristitud
Pind	67 km²
Telefonkod	+236-
Aigvö	UTC+1

Bangi (franc.: Bangui [bɑ̃ɡi]) , sango: Kötä gbätä tî Bangî) om Keskafrikan Tazovaldkundan pälidn da kaikiš suremb lidn.

Eländpunktan aluz om pandud vl 1889 kuti francine sodapost. Se oli kolonijan administrativižeks keskuseks, vspäi 1960 ripmatoman valdkundan pälidn. Bangin universitet om avaitud vl 1970.

Bangi om torguindan i kommercijan keskuz. Valdkundan kaik irdpol'ne torguind tegese pälidnas, puvill, pumaterialad, kofe i sizal' lähttas eksportaks. Tehtas nenid produktoid Bangiš: tekstil', sömtavarad (sidä kesken olud), kengäd, muilad. Jogiport i rahvahidenkeskeine lendimport ratas lidnas.

Lidn sijadase valdkundan suvipäivlaskmas, Ubangi-jogen oiktal pohjoižel randal (Kongo-jogen oiged ližajogi), 369 m ü.m.t. keskmäižel korktusel. Nimituz znamoičeb «kos'ked», ned oma jogen mödvedhe. Kongon Demokratine Tazovaldkund da sen Zongo-lidn levinedas jogen vastrandal, lidnad ühtenzoittas ehtatimel.

Klimat om tropižen savannan. Kun keskmäine lämuz om +25..+27 C° vodes läbi. Ekstremumad oma +13 C° i +39 C°. Paneb sadegid 1520 mm vodes, vähemba tal'vkus-uhokus (20..39 mm kus), enamba semendkus i heinkus-redukus (170..240 mm kus). Vihmoiden aigan relätivine nepsuz om 80..83 %. Ezilidnad alangoiš alištudas sur'vezile. Pälidn sijadase Afrikan kaikiš järedamban magnitanomalijan keskuses, se anomalii om ellips seičemesadad i tuha kilometrad surtte.

Vl 2012 lidnan eläjiden lugu oli 734 350 ristitud. Valdkundan ristitišton tobj pala eläb pälidnas da läz sidä.

Bangi Vikiaitas