Каралеўства Нідэрляндаў складаецца зь 7 тэрыторыяў. Апроч уласна Нідэрляндаў, якія знаходзяцца ў Заходняй Эўропе, да Каралеўства належыць 6 валоданьняў у Карыбскім моры. Аруба, Кюрасао й Сінт-Мартэн зьяўляюцца вольна асацыяванымі дзяржавамі ў складзе Каралеўства, Банэйр, Сінт-Эстатыюс ды Саба — асаблівыя супольнасьці (па-нідэрляндзку: bijzondere gemeenten), якія не ўваходзяць у ніводную зь нідэрляндзкіх правінцыяў. Агульнадзяржаўнай канстытуцыяй краіны ад 1954 году зьяўляецца Хартыя Каралеўства Нідэрляндаў.
Плошча Каралеўства Нідэрляндаў складае 42 519 км², ягонае насельніцтва — 16 801 000 чал. Плошча карыбскай часткі Каралеўства — 993 км², насельніцтва 301 000 чал.
