Acelomorfos

Acelomorfos
Clasificación científica
Dominio: Eukaryota
Reino: Animalia
Subreino: Eumetazoa
(sen clasif.) Bilateria
Filo: Acoelomorpha
Baguñà & Riutort, 2004
Clases

Os acelomorfos (Acœlomorpha, que significa "formas sen celoma") son un discutido filo de animais mariños de corpo brando con características de plánula. A maioría das súas especies son de vida libre, e algunhas viven na superficie doutros organismos, como ectocomensais.[1]

Tradicionalmente foron considerados como subfilo dos platihelmintos turbelarios, e máis tarde como subfilo dos Xenacoelomorpha (que estaría constituído polos subfilos Acoelomorpha e Xenoturbellida).[2][3] Pero en 2004 estudos moleculares feitos por Jaume Baguñà e Marta Riutort demostraron que debían considerarse como un filo separado.[4]

Actualmente acelomorfos e xenoturbélidos considéranse filos independentes.[5]

Segundo os traballos Baguñà e Riutort, os acelomorfos estarían na base dos bilaterais, e comprenderían os acelos e os nemertodermátidos, dúas antigas ordes de turbelarios convertidas agora en clases.

Os acelomorfos son diminutos vermes planos que carecen de intestino. O alimento é dixerido no interior de vacúolos que se forman arredor da inxesta. Carecen de cavidade xeral, de aí o seu nome. Posúen un estatocisto que posibelmente lles serve para controlar a gravidade e orientarse.

Todas as especies coñecidas son mariñas e habitan entre as partículas de sedimentos, flotando na auga formando parte do plancto, ou nadando entre as algas.

Notas

  1. ↑ Mwinyi, A.; Bailly, X.; Bourlat, S. J.; Jondelius, U.; Littlewood, D. T. J. e Podsiadlowski, L. (2010): "The phylogenetic position of Acoela as revealed by the complete mitochondrial genome of Symsagittifera roscoffensis". BMC Evolutionary Biology 10: 309 [1]
  2. ↑ Acoelomorpha en World Registrr of Marine Species.
  3. ↑ Xenacoelomorpha en WoRMS.
  4. ↑ Baguñà, J. e Riutort, M. (2004): "Molecular phylogeny of the Platyhelminthes" (resumo) Arquivado 19 de decembro de 2014 en Wayback Machine.. Can. J. Zool. 82: 168-193.
  5. ↑ Hervé Philippe, Henner Brinkmann, Richard R. Copley, Leonid L. Moroz, Hiroaki Nakano, Albert J. Poustka, Andreas Wallberg, Kevin J. Peterson & Maximilian J. Telford (2011): "Acoelomorph flatworms are deuterostomes related to Xenoturbella". Nature 470: 255–258. Resumo

Véxase tamén

Outros artigos