Museo Numismático de Atenas

Museo Numismático de Atenas
Νομισματικό Μουσείο Αθηνών
Fachada principal do
Museo Numismático de Atenas
Coordenadas37°58′40″N 23°44′07″L / 37.9778, 23.7354
PaísGrecia
CidadePanepistimiou Street
DirectorGiorgos Kakavas
Inauguración1838
Na rede
http://www.nummus.gr/
[ editar datos en Wikidata ]

O Museo Numismático de Atenas (en grego: Νομισματικό Μουσείο Αθηνών) é unha das institucións museísticas máis importantes de Grecia, que aloxa unha das coleccións máis completas do mundo de moedas antigas e modernas.[1]

O museo ten a súa sede na que foi a mansión do arqueólogo Heinrich Schliemann (1822-1890), coñecida como "Palacio de Llion" (Ιλίου Μέλαθρον -Iliou Melathron-).[2]

Historia

Fachada do Museo Numismático de Atenas

A primeira tentativa de elaborar unha colección estatal produciuse pouco despois da independencia de Grecia en Exina. Aquela primitiva colección foi enriquecida a través de diversas escavacións, compras e doazóns.

O museo propiamente dito fundouse en 1838, na mesma época que o Museo Arqueolóxico Nacional de Atenas, aínda que cumpriu o paso de varios anos e a publicación dunha regulación específica para que ambas as institucións chegasen a ser totalmente independentes, nunha primeira etapa en 1893 e, posteriormente, a partir de 1965.

Inicialmente, a colección formaba parte da Biblioteca Nacional de Grecia e estaba aloxada no edificio principal da Universidade de Atenas, onde se exhibiu ao público por vez primeira. En 1946, a colección foi trasladada á sede do Museo Arqueolóxico Nacional e, finalmente, en 1984 decidiuse levala á súa situación actual, na que se estableceu en 1998 logo das oportunas obras de acondicionamento.[3][4]

O edificio Iliou Melathron

O edificio do museo en 1896

O edificio de tres andares Iliou Melathron, que acolle o Museo Numismático, atópase na rúa Panepistimiou (Οδός Πανεπιστημίου; "Rúa da Universidade"), preto da coñecida praza Syntagma. Foi construído entre 1878 e 1880 para Heinrich Schliemann, baixo a dirección do afamado arquitecto Ernst Ziller.[5][6][7]

Na época da súa construción, considerouse como a residencia privada máis abraiante de Atenas, cun deseño exterior de inspiración tanto neorenacentista como neoclásica, mentres que o interior amosa influencia da arquitectura de Pompeia. Os cuartos están decorados con mosaicos e murais que representan temas da Guerra de Troia e motivos gregos.

En 1927, a viúva de Heinrich Schliemann, Sofía, vendeulle o edificio ao Estado Grego, que o dedicou inicialmente á sede do Consello de Estado e posteriormente á do Tribunal de Casación.[8]

O uso do edificio como tribunal de xustiza ocasionoulle moitos danos, que obrigaron a sometelo a unha importante renovación para poder albergar o Museo Numismático; entre outras cousas, restauráronse os mosaicos e os murais.[9]

Finalmente, a colección numismática foi inaugurada na parte restaurada do edificio en 1998 e non acabou de estar totalmente visitable ata 2007.[10][11]

Coleccións

Vista do interior do Museo Numismático de Atenas.

A colección do museo componse de 600.000 obxectos, principalmente moedas aínda que tamén medallas, pesas padrón, cuños, selos e outros, desde o século -XIV a. de C. ata os tempos actuais. A disposición da colección ten unha orientación cronolóxica. O museo posúe unha importante colección de moedas desde o século VI a. de C. ata o século V d. de C., como as das cidades-Estado gregas e as dos períodos helenístico e romano. Tamén cómpre salientar as coleccións bizantinas e medievais de Europa Occidental, do Oriente e do Imperio Otomán.[12][13]

Unha gran parte da colección está constituída por moedas procedentes de achados arqueolóxicos, e o resto provén da colección inicial de Exina e de diversas doazóns e adquisicións.[14]

O museo aloxa tamén unha biblioteca de 12 000 libros especializados no estudo da da moeda, ademais dun laboratorio para a conservación dos obxectos expostos e custodiados.[15][16]

Directores do museo

Galería de imaxes de obxectos expostos

Notas

  1. ↑ "Numismatic Museum of Athens Arquivado 08 de outubro de 2018 en Wayback Machine.". En www.museeum.com
  2. ↑ Stylianakos Korrés, G. "Iliou Melathron - Heinrich Schliemanns Wohnpalais in Athen". En Heinrich-Schliemann-Museum.
  3. ↑ "The History of the Numismatic Museum". No sitio web oficial do museo.
  4. ↑ "Numismatic Museum Iliou Melathron". En Athens Info Guide.
  5. ↑ "Iliou Melathron". En Archeology of the City of Athens: Contemporary Monuments Database.
  6. ↑ "Heinrich Schliemann". No sitio web oficial do museo.
  7. ↑ "Ernst Ziller". No sitio web oficial do museo.
  8. ↑ Damaskos, D. "Der zweite Palast von Troja Schliemanns Wohnhaus in Athen als Numismatisches Museum". En Der Tagesspiegel. 25 de abril de 1999.
  9. ↑ "Conservation works". No sitio web oficial do museo.
  10. ↑ "The Iliou Melathron". No sitio web oficial do museo.
  11. ↑ "The Iliou Melathron". No sitio web oficial do museo.
  12. ↑ "The Permanent Exhibition". No sitio web oficial do museo.
  13. ↑ "Numismatic Museum of Athens". En Numista.
  14. ↑ "Acquisitions 1994-2000. Donations-Sponsorships-Bequests". No sitio web opficial do museo.
  15. ↑ "The Library". No sitio web oficial do museo.
  16. ↑ "The Numismatic Museum Conservation Lab". No sitio web oficial do museo.

Véxase tamén

Outros artigos

Bibliografía

Ligazóns externas