Cupre

Cupre es un elemento cimical con la simbol Cu e un numero atomal 29. Lo es un metal mol, curvable, e formable, con un condui termal e eletrical multe alta. Un surfas fresca esposada de cupre pur ave un color orania rosin. Cupre es usada como un conduinte de caldia e eletrica, como un materia per construi, e como un composante de alias de metales variosa, como arjento sterling usada en joalas, cupronicel usada per fabrica utiles su mar e moneta, e constantan usada en tensimetres e termoduples per mesura temperatures.

Cupre es un de poca metales cual pote aveni en natur en un forma metal direta usable (pd un metal nativa). Esta ia resulta en la usa umana multe temprana en rejiones variosa, de sirca 8000 aec. Miles de anios plu tarda, lo ia es la metal prima cual es fondeda de minerales de sulfito, sirca 5000 aec, la metal prima cual es formida en un molda, sirca 4000 aec, e la metal prima per es aliada intendente con un otra metal, stanio, per crea bronze, sirca 3500 aec.

En la eda roman, cupre ia es xef minada a Cipros, cual es la orijina de la nom de la metal, de aes Cyprium (metal de Cipros), plu tarda malida a cuprum (latina) e cupre (elefen).

Composas comun videda es cupre(2) sales, cual comun dona colores blu o verde a minerales como azurita, malacita, e turcesa, e ia es usada vasta e istorial como pigmentos.

Cupre es usada en construidas, tipal per tetos, e osidi per formi un patina verde. Cupre es a veses usada en arte de decora, como un metal natural e en composada como pigmentos. Composadas de cupre es usada como ajentes bateriostatica, fungisides, e conservantes de lenio.

Cupre es esensal per tota viventes como un mineral de nuri, car lo es un composante clavin de la compleso de enzimas de respira, sitocromo-c osidase. En moluscos e crustaseos, cupre es un composante de la pigmento de sangue emosianina, paralel a emoglobina en vertebratos. En umanas, cupre es trovada xef en la figato, musculos, e osos. La corpo de un adulte conteni entre 1.4 e 2.1 mg de cupre per cilogram de pesa de corpo.