Liskovo

Liskovo
Лысково

Lidnanznam	Flag
Valdkund	Venäma
Eläjiden lugu (2020)	21,063 ristitud
Pind	17 km²
Telefonkod	+7−83 149-xx-xxx
Avtokod	52, 152
Aigvö	UTC+3 (MSK+0)

Liskovo (ven.: Лы́сково, nitmar.: Сендевӱд) om Venäman lidn da lidnankund Alalidnan agjan keskuzpalan päivnouzmas. Se om Liskovon rajonan administrativine keskuz (vspäi 1929), ümbrik om sätud sen territorijal vn 2020 semendkus.

Istorii

Eländpunkt om olmas 12. voz'sadaspäi, no mainitase ezmäižen kerdan aigkirjas vl 1410. Ühtni Makarjevan jarmankha 17. voz'sadaspäi, jäi torguindan keskuseks jarmankan sirdandan jäl'ghe Alauz'lidnannoks vl 1816. Järedad varažomad oliba žilos. Vl 1920 žilo kändihe makundan keskuseks oficialižikš. Sai lidnan statusad vl 1922.

Liskovo šingotase elektrotehnižel tegimel (avtotransportine mašiništ, kulundsignalad, tinadimed, silitezraudad), sauvondmaterialiden pästandal, himižel kombinatal, sömtegimištol (oludentegim, lihakombinat, konservtegim), mugažo mebel'fabrik radab.

Geografijan andmused

Lidn sijadase rajonan päivlaskmas, Volgan oiktal randpolel 2 kilometras jogen pävagospäi, 100 m ü.m.t. keskmäižel korktusel. Sundovik-jogi om lidnan lodehližeks röunaks, se lankteb Volgha pohjoižhe Liskovospäi. «Volg»-avtote (M7-trass) läbitab lidnan suvipalad. Matkad Alauz'lidnhasai om 72 km lodeheze-päivlaskmha orhal vai 90 km avtotedme. Lähembaine lidn om Knäginino 23 km suvhe orhal vai 27 km avtotedme.

Golovkovo-külä (319 rist. vl 2017) mülüi lidnankundha Liskovon ližaks, se om ani lodeheze lidnaspäi. Lidnankundan pind oli 17,46 km² edel sen tühjitust.

Eläjad

Vn 2010 Venäman rahvahanlugemižen mödhe lidnan eläjiden lugu oli 21 880 ristitud, lidnankundan — 22 165 ristitud, rajonan viž ühesandest. Kaikiš suremb lidnan ristitišt oli enamba 25 tuhad eläjid vll 1989−2001 (25 500 ristitud vl 1998). Kaik 21 293 ristitud elihe lidnas i 21 612 ristitud kaikes lidnankundas vl 2017.

Rahvahad (2010): venälaižed — 97,7%, toižed rahvahad — 2,3%.

Ortodoksižen hristanuskondan viž pühäpertid^[1] oma olmas lidnas: Sündun Voznesenjan kafedraline päjumalanpert', Spasan Toižetamižen päjumalanpert' i koume jumalanpertid. Viž toižid jumalanpertid oma kadonuded.

Liskovon agrotehnine tehnikum^[2] om professionaližen opendusen aluzkundaks.

Lidnan Duman jäl'gmäine ezimez' om Jurii Zotov (keväz'ku 2010 — kezaku 2021), hän om Liskovon ümbrikon Deputatoiden Nevondkundan ezimez' vn 2020 redukuspäi. Lidnan administracijan jäl'gmäine pämez' om Igor' Dobrotvorskii (2010 — kezaku 2021).

Galerei

• 
  Lidnankundan tobmuden pert' (2010)
• 
  Sündun Voznesenjan kafedraline päjumalanpert', vn 2010 nägu
• 
  Oludentegim vl 2014
• 
  Fizkul'turan da tervehtamižen «Olimp»-kompleks vn 2010 semendkus
• 
  Avtostancii vl 2013

Homaičendad

1. ↑ Liskovon pühäpertid sobory.ru-saital. (ven.)
2. ↑ Liskovon agrotehnižen tehnikuman sait (agrotechn.ru). (ven.)

Irdkosketused

• Lidnan da sen ümbrikon tobmuden sait (lsk.omsu-nnov.ru). (ven.)
• Lidnankundan tobmuden sait (gorod.lsk.omsu-nnov.ru). (ven.) (ližatihe andmusid vn 2020 lophusai)

Liskovo Vikiaitas