Polab binon pük vesüdaslavik edadeadöl, kel päspikon in nolüdalofüd Deutäna atimik vü flumeds: ,Elbe’ ed ,Oder’. Kobü Polänapük e kasub pük at duton lü grup lehitik pükas slavik. Lofüdü ziläka spikanas polaba, za ve lien de ,Wittenberg’ jü ,Berlin, ätopon pükaziläk särbyovanas, kels äspikons votiki püki vesüdaslavik.
Motapükispikan lätik polaba, jiel ,Emerentz Schultze’ < se vilag: ,Dolgen’, ädeadof bäldotü 88 ün yel: 1756.[1] Sekü lofüdikolunam Deutänik pük topäda ävedon Dona⸗Saxänapük. Jü prim tumyela XVIIIid polab pädemon töbo, ab ün yel: 1717 äpubon ,Collectanea Etymologica’ hiela ,Gottfried Wilhelm Leibniz, kel äninädon vödaliseda e vöďemi in polab. Ye vödemakonlet stäänikün binon el ,Vocabularium Venedicum’ (1705) fa pädana: ,Christian Hennig von Jessen’. Valodo vöds mö 2800 eloveökons. Peloveükons i pleks ömik, gamakanit bal e pöpakonads ömik.
Kif sötof binön jigam ?
Lül söton binön jigam.
Ab lül äsagon bofikanes :
Ob binob vom vemo nejönik ;
no kanob binön jigam,
ob no kanob binön jigam.
Kim sötom binön higam ?
Troglodüt söton binön higam.
Ab troglodüt äsagon bofikanes :
Ob binob lepul vemo smalik ;
no kanob binön higam,
ob no kanob binön higam.
Kin söton binön flen ?
Rab söton binön flen.
Ab rab äsagon bofikanes :
Ob binob lepul vemo blägik ;
no kanob binön flen,
ob no kanob binön flen.
Kin söton binön kvisinan ?
Lup söton binön kvisinan.
Ab lup äsagon bofikanes :
Ob binob lepul vemo badik ;
no kanob binön kvisinan,
ob no kanob binön kvisinan.
Kin söton binön lotidan ?
Liev söton binön lotidan.
Ab liev äsagon bofikanes :
Ob binob lepul vemo vifik ;
no kanob binön lotidan,
ob no kanob binön lotidan.
Kin söton binön musigan ?
Stork söton binön musigan.
Ab stork äsagon bofikanes :
Ob labob honedi vemo lunik ;
no kanob binön musigan,
ob no kanob binön musigan.