Karakum
![](http://upload.wikimedia.org/wikipedia/commons/thumb/1/1e/Takirs_of_Karakum_Desert.jpg/220px-Takirs_of_Karakum_Desert.jpg)
Karakum (rusce Каракумы; turkmensce Garagum; uzbeksce Qoraqum) je pusćina w srjedźnej Aziji, kotraž so nadeńdźe w Turkmenistanje a Uzbekistanje. Hromadźe ze susodnymaj pusćinomaj Kyzylkum a Aralkum pokrywa najwjetši dźěl nutřkowneje Turanskeje nižiny. Mjeno je wotwodźene wot turkskeju słowow kara („čorny“) a kum („pěsk“).
Pusćina leži zapadnje rěki Amudarja a słuša nimale dospołnje do turkmenskeho teritorija. Jeničce při sewjernej kromje ma tež Uzbekistan swój podźěl. Karakum wučini někak 90 % cyłkowneho teritorija Turkmenistana a je wjetša hač 400.000 km². Přez južny dźěl dla kontinentalneho połoženja nimoměry sucheje kónčiny wjedźe z lěta 1950 1445 kilometrow dołhi Karakumski kanal z wodu Amudarje směr Kaspiskeho morja.
Wosrjedź pusćiny namakaja so wjacore stare oazowe města kaž na přikład Merw. Tež židowa dróha wjedźeše přez Karakum.
Wotkaz
![](http://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)