Idrógenu

Representación animá d'un átomu de deuteriu, unu los isótopus del idrógenu.

El idrógenu (en griegu, de ὕδωρ hýdōr, genitivu ὑδρός hydrós, y γένος génos «que genera o produci áugua») es el elementu químicu de númeru atómicu 1, representau pol símbolu H. Con una massa atómica de 1,00797[1], es el más ligeru la tabra los elementus. Polo general, se presenta en la su forma molecular, formandu el gas diatómicu H2 en condicionis normalis. Esti gas es inflamabli, incoloru, inodoru, no metálicu e insolubli en áugua.[2]

Hydrogen Spectrum Test

Debíu a las sus distintas propiedáis, el idrógenu no se puei encuadral claramenti en ningún grupu la tabra periúdica, manqui una hartá vezis se sitúa en el grupu 1 (o familia 1A) por poseel un solu electrón en la capa de valencia o capa superior.

El idrógenu es el elementu químicu más abundanti, al constituil aproximadamenti el 75% la matéria visibli del universu.[3][nota 1] En la su secuencia prencipal, las estrellas están compuestas prencipalmenti por idrógenu en estau de plasma. El idrógenu elemental es relativamenti raru en la Tierra y es producíu industrialmenti a partil de hidrocarburus comu, por ejemplu, el metanu. La mayor parti del hidrógeni elemental s'obtieni in situ, es izil, en el lugar y en el momentu en que se necesita. Los mayoris mercaus del mundu disfrutan de la utilización del idrógenu pal mejoramientu de combustiblis fósilis (en el procesu de hidrocraqueu) y en la produción d'almoniacu (prencipalmenti pal mercau de fertilizantis). El idrógenu puei obtenelsu a partii del áugua por un procesu d'electrólisis, pero resulta un métodu una hartá más caru que l'obtención a partil del gas natural.[4]

El isótopu del idrógenu más común es el protiu, cuyu núcleu está formau por un únicu protón y ningún neutrón. En los compuestus iónicus, puei tenel una carga positiva (convirtiéndosi en un catión llamau hidrón, H+, compuestu únicamenti por un protón, a vezis en presencia de 1 o 2 neutronis); o carga negativa (convirtiéndosi en un anión conocíu comu hidruru, H-). Tamién se puein formal otrus isótopus, comu'l deuteriu, con un neutrón, y el tritiu, con dos neutronis. En 2001, hue criau en laboratoriu el isótopu 4H y, a partil de 2003, se sintetizun los isótopus 5H hata 7H.[5][6] El idrógenu forma compuestus con la mayoría los elementus y está presenti en el áugua y en la mayoría los compuestus orgánicus. Tié un papel particularmenti importanti en la química aceu-basi, en la que una hartá reacionis implican el intercambiu de protonis (ionis idrógenu, H+) entri moléculas solublis. Puestu qu'es el únicu átomu neutru pal que se puei resolvel analíticamenti l'ecuación de Schrödinger, el estudiu la nirgía y del enlaci del átomu d'idrógenu á síu hundamental hata el puntu d'avel desempeñau un papel prencipal en el desarrollu la mecánica cuántica.

Las características d'esti elemento y la su solubilidá en diversus metalis son mu importantis en la metalurgia, puestu qu'una hartá metalis puein sufril fragilidá en la su presencia,[7] y en el desarrollu de formas seguras d'almacenaglu pal su usu comu combustibli.[8] Es artamenti solubli en diversus compuestus que posein tierras raras y metalis de transición,[9] y puei sel disueltu tantu en metalis cristalinus comu amorfus.[10] La solubilidá del idrógenu en los metalis está influenciá polas distorsionis localis o impurezas en la estructura cristalina del metal.[11]

Guípesi tamién

  • Bomba d'idrógenu
  • Deuteriu
  • Tritio
  • Electrólisis

Nota

  1. ↑ Sin embargu, la mayor parti la massa del universu no está en la forma de barionis o elementus químicus. Guípesi matéria oscura y nirgía oscura.

Huentis

Referéncias

  1. ↑ =Christen, Hans Rudolf. "Química general". https://books.google.es/books?id=CrMTtgiB2wcC&pg=PA15&dq=masa+atomica+hidrogeno+1,007&hl=es&sa=X&ved=0ahUKEwiov6au4trcAhWkyIUKHZzPApQQ6AEIJzAA#v=onepage&q=masa%20atomica%20hidrogeno%201,007&f=false
  2. ↑ =Murphy, Ana Carolina. (2009). http://www.revistagalileu.globo.com/Revista/Common/0,,EMI112846-17774,00-HIDROGENIO+E+O+FUTURO.html Hidrogênio é o Futuro
  3. ↑ Palmer, David. (1997). http://imagine.gsfc.nasa.gov/docs/ask_astro/answers/971113i.html "Hydrogen in the Universe"
  4. ↑ Staff. (2009). http://www.fsec.ucf.edu/en/consumer/hydrogen/basics/production.htm "Hydrogen Basics — Production"
  5. ↑ Gurov, Y. B., Aleshkin, D. V., Berh, M. N., Lapushkin, S. V., Morokhov, P. V., Pechkurov, V. A., Poroshin, N. O., Sandukovsky, V. G., Tel'kushev, M. V., Chernyshev, B. A., Tschurenkova, T. D. (2004). «Spectroscopy of superheavy hydrogen isotopes in stopped-pion absorption by nuclei.» Physics of Atomic Nuclei 68(3):491-497.
  6. ↑ Korsheninnikov, A. A. et al. (2003). «Experimental Evidence for the Existence of 7H and for a Specific Structure of 8He.» Phys Rev Lett 90, 082501.
  7. ↑ Rogers, H. C. "Hydrogen Embrittlement of Metals". Science. (1999). volumen 159, número 3819, páginas 1057-1064
  8. ↑ Christensen, C. H.; Nørskov, J. K.; Johannessen, T. "Making society independent of fossil fuels — Danish researchers reveal new technology". Technical University of Denmark. http://www.dtu.dk/English/About_DTU/News.aspx?guid=%7BE6FF7D39-1EDD-41A4-BC9A-20455C2CF1A7%7D
  9. ↑ Takeshita, T.; Wallace, W. E.; Craig, R. S. "Hydrogen solubility in 1:5 compounds between yttrium or thorium and nickel or cobalt. Inorganic Chemistry. (1974). volumen 13, número 9, páginas 2282-2283
  10. ↑ Kirchheim, R.; Mutschele, T.; Kieninger, W. "Hydrogen in amorphous and nanocrystalline metals". Materials Science and Engineering. (1988). volumen 99, páginas 457-462
  11. ↑ Kirchheim, R. "Hydrogen solubility and diffusivity in defective and amorphous metals". Progress in Materials Science. (1988). volumen 32, número 4, páginas 262-325

Bibliografía

  • Cotton, F. A.; Wilkinson, G. Advanced Inorganic Chemistry: a comprehensive text, fourth edition. John Wiley & Sons. 1980. ISBN 0-471-02775-8
  • Greenwood, N. N.; Earnshaw, A. Chemistry of the Elements, second edition. Butterworth - Heinemann. 1997 ISBN 0-7506-3365-4
  • Gutiérrez Ríos, E. Química Inorgánica. Reverté. 1994. ISBN 84-291-7215-7
  • Shriver, D. F.; Atkins, P. W.; Langford, C. H. Química Inorgánica, Vol. 1 Segunda edición. Reverté. 1997 ISBN 84-291-7004-9

Atijus