Le Corbusier

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Le Corbusier, gebore es Charles-Édouard Jeanneret-Gris (La Chaux-de-Fonds, Neuchâtel, Franstaoleg Zwitserland 6 oktober 1887 - Roquebrune-Cap-Martin, Provence-Alpes-Côte d'Azur, Fraankriek, 27 augustus 1965) waor 'nen Zwitsers-Fransen arsjitek. Heer weurt zoewel gehaat es geleef in de kunswereld. Sommege vaan zien haters zien häöm zelfs es deginnege dee de arsjitektuur heet vermaord.

Jäög

Le Corbusier greujde op op 't platteland vaan Wes-Zwitserland, 't Franstaoleg deil. In 1907, wie heer negetien jaor aajd waor, besloot heer Zwitserland te verlaote en reisde door Fraankriek, um oetindelek oet te koume in Paries. E jaor later verleet heer Paries um door gaans Europa te reize, lierde heer Duits en wèrkde heer mèt väöl bekinde arsjitekte wie de Pruus Peter Behrens. Al snel, in 1910, begós heer zien eige arsjitectebureau mèt ziene neef en bleef hei wèrke tot 1940, wie heer 43 jaor aajd waor. In d'n Ierste Wereldoorlog vlöchde heer trök nao Zwitserland, umtot dit 't einegste land in de buurt waor boe heer neet in deens hoofde te goon vaan 't leger. Dao góng heer wèrke in 't oonderwies. Later begós heer 'nen tegestender te weure vaan 't kapitalisme, allewel heer noets opelek communis is gewees.

Kuns

Ziene naom beteikent op 't Limbörgs zoeget wie iemes dee op geit in de meinegte. Dizze naom leet nog mie lui dinke tot heer 'ne communis waor, umtot heer mèt dizze naom ziech zouw riechte op 't groet volk vaan Europa: 't erm volk. Dizze naom koos heer in 1920, wie heer 33 jaor aajd waor. Heer waor ein vaan opriechters vaan 'n nui kunsstruiming in 't modernisme: 't purisme. Zien gebouwe woorte ouch dèks bestempeld es kubisme. Dit kaom door de väöle euverdudeleke horizontaol en verticaol lijne. Ouch maakde de gebouwe 'ne naaksen indrök op de lui, umtot ze noets verseerd waore en me väöl nao binne kós loere. Daoneve had Le Corbusier 'nen enorme lies aon filosofie achter zien arsjitectuur. Dit waor typerend veur 't modernisme.