Ciéncias sociales
Las ciéncias sociales son un ramo de l coincimiento científico que studa ls lados sociales de l mundo houmano. Son defrentes de las artes i de las houmanidades pula preacupaçon metodológica. Ls métodos de las ciéncias sociales, cumo la ouserbaçon partecipante i l surbey, puoden ser ousados nas muitas árias de l coincimiento, na grande ária de las houmanidades i artes, mas tamien nas ciéncias sociales aplicadas, nas ciéncias de la tierra, nas ciéncias agrárias, nas ciéncias biomédicas etc. Anque polémica, ye quemun la çtinçon antre método quantitatibo i método qualitatibo.
Las deciplinas de l curriclo mínimo de las ciéncias sociales son: antropologie, sociologie, ciéncia política i metodologie científica.
Stórico
Las ciéncias sociales abrolhórun na Ouropa de l seclo XIX, mas fui ne l seclo XX, por bias de las obras de Karl Marx, Emile Durkheim i Max Weber que las ciéncias sociales se zambolbírun. La delantreira coubo-le a la sociologie: neologismo cunhado pul francés Augusto Comte, l sou purmeiro porsor.
Durkheim i ls sous pares ampenhórun-se na busca de regras de método que albantássen a un status científico l coincimiento subre la sociadade. Marx, al alrobés, mal bisto puls sous pares, fui a ancuntrar na classe trabalhadeira la sue eidentidade. Las biolença de las relaçones de trabalho desse tiempo fazírun cun que el le disse a esse grupo social, assi definido an relaçon al sistema eiquenómico capitalista, uas bezes la fuorça de streformaçon de la sociadade, outras bezes fazendo deilha solo ua pieça de l cumplexo quebra-cabeças de la stória. Ne l meio-termo antre l academicismo i l melitantismo, stá la partecipaçon de Weber, para quien la ciéncia i la política son dues bocaçones çtintas. Çtintas, mas que se puoden medir: el própio teórico de la burocracie i de l porcesso de modernizaçon, ajudou a la burocratizaçon i modernizaçon de la Almanha, acupando cargos políticos.
Sociologie
Mas porque le coubo la delantreira a la sociologie i nó a la ciéncia política, tan antiga cumo l nome de Maquiabel, ó la antropologie, tamien mais antiga? La repuosta ha de star ne l momento stórico de cunsolidaçon de l nuobo curríclo de l ansino superior ouropeu ne l cúrtio tiempo an que bigorou l mobimiento anteletual coincido cumo positibismo. Anton, la nuoba deceplina, la sociologie, bino a renobar las outras dues yá eisistentes. Assi, un decípulo de Durkheim, Marcel Mauss, dou l sentido de la renobaçon de la antropologie na Fráncia. Nun cuntesto defrente, l polaco Bronislaw Malinowski tamien cuntribuiu para la renobaçon de la antropologie pul método funcionalista, que marcou un rumpimiento cula rebirabuolta quelonialista de l studos antropológicos até ende zambolbidos na Anglaterra.
